Col 3 | MMX | STEP | Nemi miga lok kaka lorooro maxat, i lok ngan ta do miga roo xat amlong basinge lanmet eburu mi ne Karisito. Kuren la mina lok li lorooro atnimi at lempanga boro vana at laxalibet, no ne Karisito it kis ap mo loxot kitkis avolo teren saparap lekngen tino at ne Moroa.

Colossians 3

Leventaangas Ti Lorooro Nunuan

1 Nemi miga lok kaka lorooro maxat, i lok ngan ta do miga roo xat amlong basinge lanmet eburu mi ne Karisito. Kuren la mina lok li lorooro atnimi at lempanga boro vana at laxalibet, no ne Karisito it kis ap mo loxot kitkis avolo teren saparap lekngen tino at ne Moroa. 2 Mina lok li alolos lodoxoma atnemi ap mo lempanga la mina ke nom leveloklok mede xopok at lavatkangka. 3 Mila lorooro maut atnimi gara met pam, la lorooro maxat atnemi i nemen avukat mi ne Karisito saparap ne Moroa. 4 Karisito, ni lavasuun at lorooro ruturun atnemi, la do neni naba ru asuvos, kerepmo nemi bok miba ru asuvos eburu min la minaba ruuna ka lagale lisisinang teren.

5 Kuren la mina lok kepe leveloklok kakapmek i nemen atnemi, kerekngan loklok kakapmek maxamang at lixitkis epot, loklok kakapmek at labantuxu, lodoxoma liplivi tik lok laxakapmek, lavavara rik lok laxakapmek, la loklok ti belegaao, mo i lok ngan nom loklok ti lotu parap levempoovo moroa. 6 Na leveloklok naba lox asuusu lebelemamao at ne Moroa mo naba vot. 7 Gano lorooro atnimi ga umsu mi nom lempanga, la migak lox amisix i. 8 Ketla mo nga nemi mina lu xepe mi na leveloklox axap; lumukmusak, lebelemamao, lodoxoma xapmek, loklok ti lox asi tara mi levelinga, la lavapaase xapmek. 9 Nemen mita ekarang ela kantubu atnimi, mila nemi miga lok kepe vam mo lorooro maut eburu mi leveloklok teren, 10 la miga sang ka lorooro maxat, mo ne Moroa ik lox amaxat amisix i mi lakleklen teren kusu miba lok ngan lampoovo at ne Moroa, lanat tuntudum li. 11 La ti lususu ba ren keretna, kopmen bok ba leme Grik dina lok petpes ti leme Judaia, leme Judaia la nedi kopmen me Judaia, limixin etaba, limixin at lamain, limixin saksaxaruki la limixin di nemen gamasa mun; legesa Karisito mun ik lok la i suxuna lorooro atnedi axap.

12 Nemi lavaanat soksoxolik at ne Moroa la neni i balamu nimi. Kuren la, mina siga ka lebelemumu, labalamu, langsangan loklok ngangao, loklox anare la loklox atnaasan. 13 Mina mulus kaka nedi limixin di vamigis nimi la mina domampe laxakapmek atnedi di lok laxakapmek tinimi. Mina domampe laxakapmek atnedi kerekngan Leeme Silok i doxoma xepe laxakapmek atnimi. 14 La lara lavanga bok mo i silok ti nom levempipisik nunuan at lorooro, ni labalamu; la mina lox aumsu nimi mi labalamu mo naba lox eburu avukat limixin axap.

15 Mina ke limila na suxuna lorooro atnimi, mo limila ne Karisito im taba i; mila ne Moroa ga ro xaka nemi kusu mina nemen keneng at limila ngan legesa bantuxu. La amisik mina tong loklox avukat ti ne Moroa. 16 La mina ke levelinga at ne Karisito na nemen atmatkun keneng at lorooro atnimi. Mina umsu min mo do mina lox ase la mina vaase axasep ela nimi mi lakleklen at ne Moroa. La minak pixan ti ne Moroa mi lengkompixan at ne Devit la lengkompixan at lotu la lengkompixan emi asu; la lorooro atnimi na umsu mi loklok ti tong avukat saparap ne Moroa. 17 Levempanga axap mi lox i la mi vaase i, mina lox i at laasen at Leeme Silok ne Iesu, la mina tong loklox avukat ti ne Moroa, ne Temen nedik mumu leveloklox anarong at ne Karisito.

Loklok At Lixitkis Koetemen

18 Nemi lavakin. Minang tonga res at lavatlok atnimi mila na loklok, ni loklok at lavakin di nuunu at Leeme Silok.

19 Nemi lavatlok. Mina balamu lavakin atnimi, la nemen mita metlaat tidi.

20 Nemi laxamdak mi laxaalik. At lorooro axap atnemi, minang tonga res at luvuttemen nimi mi luvutnen nimi. Do mina lox i xuren, nom loklok naba lox amomo Leeme Silok.

21 Nemi luvuttemen laxamdak mi laxaalik. Nemen gat mita lox abulu laxamdak mi laxaalik atnimi; lavanga dina lok tuntun aleng.

22 Nemi lavasaxaruki. Minang tonga res at luvuttadi amgomgo atnemi at levempanga axap; kopmen do ap mo mene nga loxonaleng di reven tata nemi kusu mi vara i do dinaba ven lenget luruptuvuk nunuan atnimi; ketla mina lok lugugu atnimi mi lomomo at lebelen nimi la loklok ngangao saparap Leeme Silok. 23 Mo do lavanga salai mi lox i, mina gugu ren mi lorooro axap atnimi, kerekngan tai do mi gugu at Leeme Silok la kopmen ti laradi mun at na lavatbung menemen. 24 Mina xasep do Leeme Silok naba raba nimi mi laramtaba, i ngan luunun tinimi, mila nemi mi gugu ri ne Karisito, neni Leeme Silok atnimi. 25 La limixin bilinga axap naba lok ka luunun naba epovo mi leveloklok kakapmek digak lox i, mila ne Moroa i viila limixin axap mi legesampoovo mene nga.